கி.இரா என்னும் கதைசொல்லி

எனக்கும் கி.இராவின் எழுத்துகளுக்குமான அறிமுகம் பதின் பருவத்தில் தான் ஆரம்பித்தது. பள்ளியில் படிக்கும் போது, வருட ஆரம்பத்திலே, தமிழ் புத்தகங்களில் வரும் கதைகள் அனைத்தையும் படித்து விடுவது வழக்கம். அப்படி தான் மேல்நிலை இரண்டாம் ஆண்டு புத்தகத்தில் படித்த கதை தான் 'கதவு'. கி.இரா எனப்படும் கி. இராஜநாரயனின் முதல் கதை மாதிரி அது தெரியவில்லை. அது தான் புத்தகத்தில் இருந்த முதல் கதை. அதற்கு மேல் என்னால் படிக்க முடியவில்லை. இப்படி தான் ஆரம்பித்தது எனக்கும் அவர் எழுத்களுக்குமான தொடர்பு.

அதன் பிறகு அவ்வப்போது குமுதத்திலும், ஆனந்த விகடனிலும், அப்பா எப்பொழுதோ வாங்கின இந்தியா டுடே இலக்கிய மலர், தினமணி பொங்கல் மலர், போன்றவற்றில் வந்த அவர் கட்டுரைகளையும் தேடித் தேடி வாசிக்க ஆரம்பித்தேன். கல்லூரியில் இணைந்த பிறகு ஒரு நாள் தற்செயலாக எனது பல்கலைக்கழக நூலகத்தில் தூழாவிய போது கிடைத்தன பொக்கிஷங்கள். ஆம். கி.இராவின் அனைத்து புத்தகங்களும் ஒரு சேர கிடைத்தன. முக்கியமானவை அவரின் முழு சிறுகதை தொகுப்பும், கட்டுரை தொகுப்புகளும் தான்.

இடைச்செவலில் ஒரு சம்சாரி குடும்பத்தில் பிறந்த கி.இரா தான் எழுத ஆரம்பித்தது ஒரு விபத்து என்றே கூறுகிறார். 'கரிசல் தாத்தா' என்று அன்போடு அழைக்க படும் அவர் பிறந்த அதே ஊரில் தான் கு.அழகிரிசாமியும் பிறந்து உள்ளார். இருவரும் பால்ய நண்பர்கள். தமிழ் கடித இலக்கியங்களில் இன்றளவும் ஒரு சிறந்த படைப்பாக கருதப்படுவது கி.இராவும், அழகிரிசாமியும் எழுதி கொண்ட கடிதங்கள்.

சிறு வயது முதல் நோயாளியாகவே இருந்த அவர் காச நோயில் இருந்து மீண்ட பிறகு தன் இலக்கிய வாழ்க்கையை தொடங்கி இருக்கிறார். இன்றளவும் கரிசல் இலக்கியங்களில் முன்னடியோக கருதப் படுவது கி.இராவின் படைப்புகளே. அதன் காரணம் அவர் தன் படிப்புகளில் பதிய வைத்திருக்கும் சம்சாரியின் (விவசாயியின்) வாழ்க்கை.

எனக்கு மிகவும் பிடித்த அவரின் சிறுகதை 'மின்னல்'. ஒரு நகர பேருந்தில் தன் தாயுடன் ஏறும் ஒரு சிறு கைக் குழந்தை, அங்கு சோம்பி போயிருக்கும் சூழலை மாற்றி அந்தப் பேருந்தில் உள்ளவர்களை எப்படி மகிழ்ச்சிக்கு உள்ளாக்குகிறதே கதை. வெறும் இரு பக்கங்கள் மட்டுமே நீழும் கதை. இது போன்று தமிழ் சிறுகதையில் மகிழ்ச்சிக்கு உள்ளாக்கும் சிறுகதையை நான் இது வரை படித்து இல்லை.

கி.இராவின் கட்டுரைகள் பெரும்பாலும் சம்சாரியின் வாழ்க்கையில் அன்றாடம் நிகழும் மகிழ்ச்சியும், பிரச்சனைகளையும் நமக்கு காட்சி படுத்தும். சிறிது நையாண்டியோடு சம்சாரியின் வாழ்க்கையை அணுகி இருப்பார். அவரும் இரசிகமணி தி.க.சி'யும் பால்ய நண்பர்கள். தி.க.சியை பற்றிய கட்டுரைகள் அவர்கள் இருவரின் நட்பை பற்றி மட்டும் அல்லாது, அப்போதைய தமிழகத்தின் சமகால அரசியலைப் பற்றியும் நமக்கு தெரிவிக்கிறது.

கி.இராவின் 'கிடை' குறுநாவலை அம்ஷன் குமார், 'ஒருத்தி' எனும் பெயரில் குறும் படமாக எடுத்தார். நாவலை ஒட்டி அமைந்து இருந்தது அவரின் திரைக்கதை. கி.இராவின் முக்கியமான படைப்புகள் 'பிஞ்சுகள்', 'கோபல்லபுரம்', 'கோபல்லபுரத்து மக்கள்'. துரதிஷ்டவசமாக இவை மூன்றையும் இது வரை நான் படிக்கவில்லை. சென்னை புத்தக கண்காட்சிக்கு சென்ற போது இவை மூன்றையும் வாங்க நினைத்த போது, கையில் பணம் இல்லாமல் கனத்த மனதோடு அறை திரும்பினேன். புத்தகங்களுக்கும், பசப்போடு சுண்டி இழுக்கும் விபச்சாரிகளுக்கும் வித்தியாசம் இல்லை என்று அப்போது தான் உணர்ந்தேன்.

கி.இராவை படிக்கும் போது எழும் கரிசல் நெடி இன்று அவர் வாழ்ந்த பூமியில் இல்லை. அதனால் தன் என்னவோ, பாண்டிச்சேரியில் குடியமர்ந்து விட்டார். இன்று பாண்டிச்சேரி பல்கலைக்கழக கவுரவ பேராசிரியராக இருக்கிறார். அவரின் சில அரசியல் தொடர்புகள் சஞ்சலம் ஏற்படுத்தினாலும் தமிழ் இலக்கிய உலகின் விண்மீன் கி.இரா என்பது மறுக்க இயலாத உண்மை.

சத்யம் நிறுவனம் - பன் வித் டிக் அண்ட் ஜேன்

அதிர்ச்சி மேல் அதிரிச்சி என்று சொல்வதை தவிர வேறு ஒன்றும் தோன்றவில்லை. இந்திய மென்பொருள் நிறுவனங்களில் நான்காவது இடம் வகிக்கும் சத்யம் நிறுவனத்தின் 'திரு'. இராமலிங்க ராஜு ரூ.5000 கோடி ஊழல் செய்தாரா என்று புலனாய்வு பத்திரிகைகள் சில மாதங்களாகவே தலையங்கம் வெளியிட்டு கொண்டு இருந்தன. நேற்று அது வெட்ட வெளிச்சம் ஆகியது. 2001 ஆம் ஆண்டு வரை உலகின் தலை சிறந்த உயர்சக்தி நிறுவனமாக விளங்கிய Enron, மிகச் சாதுரியமாக பொய் கணக்கு காண்பித்து, ஒவ்வொரு வருடமும் பல ஆயிரம் கோடி டாலர்கள் லாபம் காண்பித்தது. இப்போது சத்யம் இந்தியாவின் Enron ஆகியிருக்கிறது. வெறும் முன்று சதவிகித லாபம் இருபத்து நான்கு சதவிகிதமாக காட்டப் பட்டுள்ளது. இந்த பிரச்சனைகளை சமாளிக்க தனது குடும்ப நிறுவனமான மேதாஸ் இன்பிராவில் பொய் கணக்கு காட்டிய ரூ. 5040 கோடியை முதலீடு செய்ய திட்டமிட்டார் இராமலிங்க ராஜு. முதலீட்டாளர்களின் தலையீடால் அது தடுக்கப்பட்டது.

இந்த நிலையில் நேற்று நடந்த நிறுவன இயக்குனர்களின் கூட்டத்தில் உண்மையை போட்டு உடைத்தார் ராஜு. வராக் கடன், செலவினங்கள், வட்டி அனைத்தும் சேர்த்து கிட்டத்தட்ட ஏழாயிரத்து நூற்று அறுபது கோடி ரூபாய் துண்டு முதலீட்டாளர்களின் தலை மேல் வீழ்ந்துள்ளது. இந்திய பங்கு வர்த்தகங்களை நிர்வகிக்கும் நிறுவனமான செபி சத்யம் நிறுவனத்தின் பெயரை பங்கு சந்தையில் இருந்து நீக்குவதாக அறிவித்து உள்ளது.

இந்த நிலையில் திரு. இராம் மைனம்படியை சி.இ.ஓவாக நிர்வகிப்பதாக சொல்லி எஸ்கேப் ஆகியிருக்கிறார் ராஜு. இராம்ஐ பார்க்கும் பொது எனக்கு பன் வித் டிக் அண்ட் ஜேன் திரைப்படத்தில் வரும் ஜிம் கேரி தான் நினைவுக்கு வருகிறார். அந்த திரைப்படத்தில் தனது கம்பெனி திவாலாகும் நேரத்தில், ஜிம் கேரியை கம்பெனியின் முதன்மை அலுவலராக நியமிப்பார் வில்லன். ஜிம் கேரி செய்வது அறியாது 'பெப்பரப்பே' என்று ஒரு தொலைக்காட்சிக்கு பேட்டி கொடுப்பார். அது போல் தன் இருக்கிறது திரு.மைனம்படியின் நிலைமையும்.

அதே போல் அந்த திரைப்படத்தில் கம்பெனி திவால் ஆனதும் அங்கு வேலை செய்வோர் ஆளுக்கு ஒன்றாக நிறுவனத்தின் சொத்துகளை சூறையாடி செல்வர். யார் கண்டது? அது போல் சத்யமில் நடந்தால் தேசிய தொலைக்காட்சிகள் நேரடி ஒலிபரப்பு செய்து கொண்டு கையை கட்டி கொண்டு நிற்கும்.

காஞ்சிவரம்

ஒன்று மட்டும் புரியவில்லை. சரித்திர கால படங்கள் என்றால் ஏன் செபியா டோனிலும், கருப்பு வெள்ளையிலும் மட்டும் தான் இருக்க வேண்டுமா? ஒரு வேளை கலை இயக்குனரின் தவறுகளை மூடி மறைத்து விடும் அனுகூலமாகவும் இருக்கலாம். எப்பிடி இருந்தாலும் 'திரு'. கலக்கி வீட்டிர்கள். 'சிறைச்சாலை'க்கு பிறகு மற்றொரு இறகு, பிரியதர்ஷனின் மகுடத்திற்கு. டைட்டில் கார்டில் 'காஞ்சிவரம்' - A communist confession என போட்டது படம் நெடுகிலும் ஏனோ ஒரு நெருடலை ஏற்படுத்த தவறவில்லை. 1930களில் முதலாளிகளின் பிடியில் சிக்கி தவித்த காஞ்சிபுரம் நெசவாளர்களின் பிண்ணனியில் பயனிக்கிறது கதை. 'கண் சிவந்தால் மண் சிவக்கும், தண்ணீர் தண்ணீர்' படங்களை போன்று இந்த படத்தை எதிர்பார்த்தீர்கள் ஆனால் ஏமாந்து தான் போவீர்கள். கம்யூனிச புரட்சியை ஒரு பின் நவீனத்துவ பாணியில் கையாண்டிருக்கிறார் இயக்குநர். உறுதியாகத் தெரிகிறது, பிரகாஷ்ராஜை மனதில் வைத்து தான் 'வேங்கடம்' கதாபத்திரம் உருவாக்கப் பட்டிருக்கிறது. 'இருவருக்கு' பிறகு அடுத்த தேசிய விருது உறுதி. தன் மகளுக்கு புடவை நெய்வதற்காக நூலை திருடும் போது வெளி படுத்தும் முகபாவமும் சரி, போராட்டத்தை நிறுத்துவதற்காக தன் தோழர்களிடம் பேசும் போதும் சரி, மனிதர் புகுந்து விளையாடி இருக்கிறார். இறுதி காட்சியில் திரையில் உறையும் அவரது சிரிப்பு வெகு நாட்கள் நம் மனதை விட்டு அகலாது. ஆகாயக் கோட்டை கட்டும் தன் கணவனை கண்டிக்க இயலாத மனைவியாய், படத்தின் பாதி வரை மட்டுமே வந்தாலும் தன் பாத்திரத்தைத் தெளிவாக செய்து இருக்கிறார் ஷ்ரேயா ரெட்டி. வேங்கடத்தின் நண்பர் பார்த்தசாரதியாக வரும் ஜெயக்குமார், மைத்துனராக வரும் சம்பத்குமார், போலீஸ் கான்ஸ்டபிளாக வரும் 'கூத்துப்பட்டறை' ஜார்ஜ், தம் பணியை திறம்பட செய்து உள்ளனர். 'சிறைச்சாலை'யில் செல்லுலார் ஜெயிலையே செட்டாக வடித்த சாபு சிரிலுக்கு இந்த படம் ஜீஜூபி என்று தான் சொல்ல வேண்டும். சைக்கிளுக்கு பொருத்தப் படும் 1930ம் வருடத்திய விளக்கு, அப்போது உபயோகப் படுத்தப் பட்ட தறிகள் என்று நிறையவே மெனக் கெட்டிருக்கிறார். வணிகப் படங்கள், திரைப்பட விழாவிற்கு என எடுக்கப்படும் திரைப்படங்கள் என்ற இடைவெளி எப்போது மாறும் என்று தெரியவில்லை. இந்த சாபக்கேட்டிற்கு 'காஞ்சிவரமும்' விதிவிலக்கல்ல. எப்படியாயினும் 'காஞ்சிவரம்' தமிழ் சினிமாவின் வரமே!!!